Sar dard ka ilaj - 100% natural and effective - Healthocrat: Your ultimate fitness partner

Sunday, November 18, 2018

Sar dard ka ilaj - 100% natural and effective


Kya aap sar dard se bahut hi zyada pareshan rehte hain? Kya aap sar dard ka ilaj ghar baithe aasani se karna chahte hain? To is article ko dhyaanpoorvak padhe.

Zindagi me har vyakti kabhi na kabhi sar dard ka shikar ho hi jata hai. Sadhaaran sar dard ki samasya zyadatar aankho me thakaan, dhoop me zyada samay bitaane, galat tarike se sone ya neend poori na hone, ya khanpan me gadbadi aane ke karan hoti hai. Iske alawa kayi baar sardi zukhaam ya bahot zyada tension hone par bhi sar me dard hone lagta hai. Jab sar me dard kabhi kabhi ya kam samay ke liye hota hai, tab ise aasani se theek kiya ja sakta hai. Lekin jab sar me dard baar baar ya lambe samay tak hone lage to yah migraine ki samasya ho sakti hai.

Sar dard ka ilaj - 100% natural and effective


Migraine ek bahot hi dardnaak aur gambheer bimaari hai. Sath hi yah samay ke sath sath badhti bhi jati hai. Migraine ko samajhna aur iska ilaj karna ek pechida kaam hai. Isliye aksar log kehte hain ki migraine se hone wale dard se chhutkara paana khud apne aap me ek sar dard ban jata hai. Kyunki migraine me hone wala dard ek se adhik karano se ho sakta hai aur sath hi alag alag logo me iske hone ki wajah bhi alag alag ho sakti hai. Kayi baar yah dard itna badh jata hai ki iske karan koi bhi kaam kar pana asambhav ho jata hai aur fir humare pas dawaiyan khane ke alawa aur koi dusra rasta nahi bachta.

Aisa hone par dheere dheere hume dawaiyo ki aadat padne lag jati hai jiska humare pet aur kidney par bahut bura prabhav padta hai. Dawaiyan khana kisi bhi sthithi me sar dard ya migraine ko theek karne ka sahi tarika nahi hota. Is bimari ko keval apne lifestyle me badlaav laakar aur kuch aasan gharelu nuskho ka istemal karke hi hamesha ke liye theek kiya ja sakta hai kyunki sirf in tariko se hi is bimari ki jad par asar hota hai aur fir bar bar sar dard ya migraine ki samasya poori tarah theek ho jati hai.

Aaj is article me hum aapko batayenge kuch asaan nuskhe aur saavdhaniyan jinke istemal se sar dard aur migraine ki samasya me fark aane lagega aur sath hi lagatar inke istemal se yah bimari kuch hi samay me poori tarah theek ho jayegi. Lekin usse pehle yah jaan lete hain ki sar me dard aakhir hota kyu hai?

Sar dard ke karan

Humare dimag ke andar serotonin namak chemical paya jata hai jo ki humare mood, emotions aur bhavnaao ki wajah se prabhavit hota hai. Jab humare dimag me serotonin ki matra badhti hai, tab hume khushi mehsoos hoti hai aur sab kuch achcha lagne lagta hai. Lekin agar iski matra kam ho jaye tab iski wajah se tension, stress, sar dard, depression jaisi samasyaein hone lagti hai.

Zyadatar yah dekha gaya hai ki jin logo ko migraine ya lagataar sar me dard rehta hai, unke dimag me serotonin chemical ka santulan poori tarah bigda hua hota hai. Isliye jin logo ki rozana zindagi me stress aur tension zyada hota hai aur jo log bachpan se ya ek lambe samay se apne jivan me kisi tarah ki pareshani se guzar rahe hain, unhe ek samay par aakar gambheer migraine ki samasya ho hi jati hai.

Migraine ka dard aadhe sar me, aankho ke piche, ya aankho ke aaspaas wale hisse me hota hai aur ayurved ke nazariye se agar dekha jaye to is tarah ka dard sharir me vaat aur pitt ki adhikta ke karan hota hai. Isliye zyadatar migraine ki bimari ke logo ko acidity, gas ya pet ki koi dusri samasya zarur hoti hai. Migraine hone par tej light aur tej awaaz ki sensitivity badh jati hai. Sath hi kuch logo ko smell, ya koi vishesh khane par migraine hone lagta hai.

Lambe samay tak bhookhe rehne ya sharir me paani ki kami hone se bhi achanak sar me dard hona shuru ho jata hai. Sath hi neend poori nahi hone, ya bahot zyada kaam me tension badhne se bhi migraine ka dard shuru ho jata hai. Agar aap sar dard ka ilaj safaltapoorvak karna chahte hain to ilaj aur nuskho ke sath parhej aur savdhaani baratna bhi utna hi zaruri hai kyunki yah un bimariyo mese hai jinme dawaiyon se zyada parhej aur savdhani baratne se fark padta hai.

To chaliye jante hain ki aap sar ka ilaj kaise kar sakte hain aur kaun si baato ka aapko dhyaan rakhna chahiye.

Sar dard ka ilaj

Isme sabse pehle baat karenge kuch external yaani ki bahari roop se istemal kiye jane walo nuskho ki aur fir hum baar karenge kuch khane wale nuskho ki.

Badaam ka tel, chandan aur peppermint


is image me ek bowl me badaam rakhe hue dikhaye gaye hain


Hamara jo pehle nuskha hai use banane ke liye hume zarurat hogi badam ke tel, gulab jal, chandan powder aur peppermint oil ki.
  • Sabse pehle ek chammach badaam ke tel me paanch peppermint ki boonde daal kar isse apne sar aur forehead ki 5 se 10 minute tak achi tarah massage karen. Peppermint oil hamare dimag ki naso ko shant karta hai sath hi iske istemal se lambe samay tak thandak pradan hoti hai aur tej ho rahe sard dard se turant rahat milti hai.
  • 5-10 minute tak halke hato se massage karne ke baad ek chammach chandan powder me gulab jal aur 7-8 boond peppermnt oil mila kar iska ek paste taiyar kar le.
  • Iske bad is paste ko apne forehead yaani ki poore maathe par poori tarah laga le.
Chandaan ka istemal ayurved me bataya gaya hai. Iske andar cooling property hoti hai jo dimag ki naso ko thanda karti hai aur dimag ki thakaan aur stress ko bhi door karti hai.

Migraine ki problem me massage aur chandan ka paste ka istemal rozana raat ko sone se pehle ya subah uthne ke baad 15-20 minute ke liye kiya ja sakta hai aur sath hi tej dard hone par bhi inke istemal se turant raahat milti hai.

Raat ko sote samay agar apne maathe par chandan lagate hain to iski keval ek patli layer hi lagaye taaki lagane ke baad yah asaani se sookh jaye. Iske alawa ek aur nuskha jiska ki raat ko sone se pehle istemal karne se sar dard aur migraine ki samasya me bahot jaldi labh milta hai. Vah hai badaam ka tel aur gaay ka ghee.

Gaay (cow) ka ghee hai labhdayak

Migraine hone par hamare dimag ke naso me sukhapan aur kamzori aa jati hai jisse ki thakaan hone par ya lagatar roshni ke sampark me rehne par humara dimag use sehan nahi kar pata aur is vajah se aankho ke aas paas aur sar me dard hona shuru ho jata hai. Aise me is kamzori ko door karne ke liye gaay ka ghee aur badaam ka tel bahut adhik faydemand hote hain.

Ghee ko pehle halka garam kar len aur rozana raat ko sone se pehle dropper ki madad se iski ek ek boond apne dono naak me daalkar let jaayen.

Uske baad dheere dheere gehri saans len. Aisa karne se ghee ka kuch ansh humare gale aur kuch ansh humare dimag tak pahunchta hai. Theek isi tarah badaam ke tel ka bhi istemal kiya ja sakta hai. Lekin ek baar me ghee aur badaam ke tel me se kisi ek cheez ka hi istemal karen. Isme hume keval rogan badaam tel ka hi istemal karna hai. Sar me lagane wale tel ka istemal na karen. Agar aap rozana raat ko apni naak me gaay ka shudh desi ghee daal kar sote hain to matra 7 dino me hi aapko is samasya me kamaal ka fark nazar aane lagega aur dheere dheere yah bimari poori tarah khatam ho jayegi.

Lekin dhyaan rahe ki ghee keval shudh aur gaay ka hi hona chahiye. Tabhi aapko isse jaldi parinaam praapt honge. Gaay ka ghee humare dimag par dawai ki tarah asar dikhata hai aur sath hi yah jitna purana hota jata hai, utna hi asardaar banta jata hai.

Ab baat karte hain kuch khaye jaane wale nuskho ke baare me.

Adrak ki chai ka kare sevan

Migraine ya sar dard hone par adrak ki chai ka sevan karna bahot hi faydemand hota hai. Ek glas paani me ek chammach kaddukas kiya hua adrak aur ek chammach saunf daalkar ise 5 se 6 minute tak ubaal le.

is image me ek cup me adrak ki chai aur bagal me adrak rakha hua dikhaya gaya hai


Iske baad ise chhaan kar isme 1 chammach shahad mila len. Is tarah se yah chai taiyar ho jayegi. Hafte me 3 baar is chai ka sevan subah naashta karne ke baad kare ya jis samay aapko sar me dard hota hai, us samay is adrak ki chai ka sevan kiya ja sakta hai. Adrak ka sheeghra asar sar dard paida karne wale hormones par hota hai aur sath hi yah humare pet ke liye bhi faaydemand hota hai. Lekin iska lagataar istemal na karen. 1 ya 2 din chhodh kar hi ise use karen.

Dry fruits se sar dard ka ilaj hai sambhav

Baat agar sar dard ka ilaj ki ho to badaam, akhrot, aur alsi ka sevan karna bhi sar dard hone par chamatkaari roop se faydemand hota hai. Lekin achche aur jaldi parinaam ke liye ise sahi tarike se khana bahot zaruri hai.

7-8 badaam aur akhrot ko raat bhar ke liye paani me bhigo kar rakh den. Uske baad agle din inke chhilke nikaal kar subah ke samay ya din ke samay khana khane ke ek ghante baad inhe chaba chaba kar khayen. Isi tarah se alsi ka sevan bhi din me ek baar ek chammach khana khane ke baad kiya ja sakta hai. Alsi badaam aur akhrot me kayi tarah ke poshak tatva aur fatty acids paye jate hain jinka sidha asar humare dimag par hota hai. Khaas kar sar dard aur migraine jaisi bimari me yah dawai ki tarah kaam karte hain. Lekin badaam aur akhrot ka sevan raat bhar bhigokar aur chhilke nikaal kar hi karen.

Sar dard ka ilaj kare gaazar, chukandar aur paalak ka juice peekar

Jin logo ki sharir me pitt ki matra badh jane ki wajah se sar me dard rehta hai, unhe hamesha alkaline diet lene ki salaah di jati hai. Aise me gaazar, chukandar aur paalak ka juice banakar peene se iss samasya me bahot teji se fayda milne lagta hai. Paalak, gaazar aur chukandar me iron, vitamin aur kayi tarah ke fatty acids ki matra adhik hoti hai aur yah sabhi humare dimag ke naso ko mazboot karne aur khaaskar sar me hone wale dard ko kam karne ka kaam karte hain.

is image me ek glass me paalak, chukandar aur gaazar ka juice rakha dikhaya gaya hai


Rozaana subah naashte me paalak, chukandar aur gaazar ka juice banakar peene se yah humare pet ke liye bhi bahot faydemand hota hai aur sath hi humare sharir me khoon ki matra ko badha kar humein din bhar ke liye achchi energy bhi pradaan karta hai. Iska juice banane se pehle paalak ko achchi tarah se dhokar 5 minute tak garam paani me bhigo kar rakhen aur gaazar tatha chukandar ke chhilke nikaalne ke baad hi juice banaye.

Trifala ka kare sevan

Migraine ya sar me hone wale kisi bhi dard ki shuruaat humare pet se hi hoti hai. Isliye kabhi bhi pet me acidity ya gas nahi hona chahiye aur humesha pet bhi poori tarah se saaf rehna chahiye. Iske liye rozaana raat ko khaana khaane ke baad halke garam paani ke sath ek chammach trifala churan ka sevan zarur karen. Trifala churan humare pet ke sath sath humare dimag ke liye bhi faydemand hota hai.

Iska istemal hafte me do baar kiya ja sakta hai. Trifala churan ka istemal karne se humare sharir me jami har tarah ki gandagi bahar nikalti jati hai aur sar me hone wala dard bhi dheere dheere kam hota chala jata hai.

In baato ka rakhen vishesh dhyaan

Sabhi tarah ke nuskho, dawaiyon ya doctor ke treatment ke sath sath migraine ki bimari me kayi tarah ki savdhaani baratna bhi bahot adhik zaruri hota hai. Kyunki kayi baar jaane anjaane hum bahot saari cheeze aisi kar rahe hote hai jo is bimari ko aur zyada badha rahi hoti hai aur sath hi inki wajah se kiye gaye sar dard ka ilaj poori tarah nahi ho pata hai. Agar aap safaltapoorvak apne sar dard ka ilaj karna chahte hain, to in baato ko hamesha yaad rakhe:

Caffeine hai sar dard me khatarnaak

Sar dard aur migraine ki samasya me jo sabse zyada khatanaak hota hai, veh hai caffeine. Caffeine ek aisi cheez hai jis ki wajah se sar dard ka ilaj poori tarah asafal ho sakta hai. Chai, coffee, cold drink aur energy drinks me caffeine ki matra adhik hoti hai. Isliye in cheezo ka sevan bilkul na karen.

Khatti cheezo se kare parhej

Ise alawa bahot zyada khatti cheezon ka sevan karne se bhi humare sharir me acid ki matra badhti hai jisse ki sar dard hone ki sambhaavna badh jati hai. Isliye bahot zyada khatti cheezein jaise ki chaat, achaar aur khatte falo ka sevan kam se kam kare.

Thandi aur sookhi cheezein na khaye

Bahot zyada rukhi sukhi cheezein jo humare sharir me paani ki kami ko paida karti ho unka sevan karne se pet me gas ki matra badhti hai aur yahi badhi hui gas kayi baar sar me tej dard paida kar deti hai. Isliye bahot zyada thandi aur sookhi cheezein jaise ki chips, biscuit, bread, ice cream, packet me milne wale snacks aur cold drink aadi ka sevan kam se kam kare. Aur khaane me hamesha gravey wali cheezein zyada khayen.

Junk food ka sevan na kare

Baahar milne wali maide se bani cheezein jinhe humare pet ko pachaane me bahot zyada mehnat karni padti hain, aisi cheezein bhi migraine ki bimari ko kaafi hadd tak badha deti hain.

Har roz yoga kare

Migraine aur sard dard ki bimari me jis cheez se sabse zyada jaldi asar dikhta hai aur jiske zariye is bimari ko poori tarah hamesha ke liye khatam kiya ja sakta hai, vah hai dimag ki shanti aur yoga. Baar baar hone wale sar me dard se bachne ke liye koshish karen ki aap apne dimag ko poore samay shant rakhen. Dimag ko shant karne ke liye rozana subah anulom vilom aur pranaayam zarur karen. Migraine aur sar dard ki samasya me anulom-vilom itna asardaar hota hai ki ise karne ke pehle din se hi aapko fark dikhna shuru ho jayega. Aur iski sabse khaas baat yah hai ki ise karna bahot zyada asaan hai.

Neend poori le

Dimag shant rakhne ke liye sabse pehle to kam se kam 7 se 8 ghante ki achchi neend len kyunki ek achchi neend se hi humare dimag ki naso ko araam milta hai aur sath hi stress aur tension bhi kam ho jata hai. Lekin agar aap ki neend poori nahi hoti hai to aap ka sar dard hamesha bana hi rahega. Iske alawa Dimag ko shant karne ke liye rozana subah anulom vilom aur pranaayam zarur karen. Migraine aur sar dard ki samasya me anulom-vilom itna asardaar hota hai ki ise karne ke pehle din se hi aapko fark dikhna shuru ho jayega. Aur iski sabse khaas baat yah hai ki ise karna bahot zyada asaan hai.

Paani adhik piye

Iske alawa jinhe sar me aksar dard rehta hai, unhe dusre logo ke mukaable paani bhi zyada peena chahiye. Kyunki kayi baar keval paani ki kami ke karan sar me achanak dard paida hone lagta hai. Dosto is samasya se chhutkara pane ke liye nuskho ke sath sath batai gayi sabhi baato ka dhyaan rakhna bhi bahot avashyak hai tabhi is bimari se chhutkara paya ja sakta hai.


To ab sar dard ka ilaj karna aapke liye baaye hath ka khel hai. Is article ko apne dosto ke sath bhi share kare taaki ve log bhi sar dard ka ilaj ghar baithe kar payen.


Hum umeed karte hain ki aapko humare article 'Sar dard ka ilaj - 100% natural and effective' se koi madad to zarur mili hogi. 

Ye bhi padhe:
Green tea ke fayde aur banane ki vidhi
High calorie foods for weight gain
Health benefits of carrot juice


Dhanyawaad.


Image source: Pixabay

No comments:

Post a Comment