Pimples kaise hataye - Padhen 11 gharelu upay saral bhasha me - Healthocrat: Your ultimate fitness partner

Monday, November 12, 2018

Pimples kaise hataye - Padhen 11 gharelu upay saral bhasha me

Kya aap janna chahte hain ki aap apne chehre ke pimples kaise hataye?Is article ko dhyanpoorvak padhen.

Ladke ho ya ladkiyan, pimples sabke chehre ki sundarta chheen lete hain. Inke rehte hue ek khoobsurat chehra bhi badsurat nazar aane lagta hai. Pimples aam taur par teenagers ko prabhavit karte hain aur chehre par ek baar pimples aajayen to inse chhutkara paana kafi mushkil ho jata hai. Aajkal har koi apne aapko dusro se behtar sabit karne ki hod me rehta hai. Har koi apni ek alag pehchaan banana chahta hai. Aise me chehre par pimples aane ke karan chehre ki saundaryata ke alawa confidence bhi jaane lagta hai. Isse prabhavit log dusro se milna kam kar dete hain.

Pimples kaise hataye - Padhen 11 gharelu upay saral bhasha me


Mai agar apni baat karu to mere sath bhi kuch aisa hi hua tha. Jab mere chehre par pimples hue the tab mai aksar akele baithna pasand karta tha kyunki log aksar mere pimples ke karan mujhe toka karte the. Aur ye sirf meri akele ki kahani nahi balki har pimples se prabhavit aadmi ki hai. Mai jab bhi logo se pucha karta ki pimples kaise hataye to ek hi jawab aata aur wo tha ki dawaiyo ka sevan karen. Mai aapko bata dena chahta hu ki pimples ki bahut si dawaiyan bazar me uplabdh hain lekin inse sharir par bahut se dushprabhav padte hain. Isliye angrezi dawaiyon se behtar hai ki aap pimples se chhutkara pane ke liye desi nuskhe apnayen. Isse aapke sharir par koi side effect nahi padega. Pimples ek aisi samasya hai jisse permanent chhutkara pana bahut hi mushkil hai. Jaha aap kuch din dawaiyan lena band karte hain, pimples dobara se aapke darwaze par dastak dene lagte hain. Inko jad se hatane ke liye ye zaruri hai ki aap pehle ye jane ki pimples hone ke karan kya hain aur fir inhe hatane ka prayas karen. Isko aap ek udharan ke madad se bhi samajh sakte hain.

Maan lijiye ki aap kisi naav par baithkar nadi paar kar rahe hain. Us naav me kisi karan ek chhed ho gaya aur paani bar bar aapki naav me aane laga. Ab aap ek balti ya mug ki madad se agar pani nikalte hain to paani ko dobara naav me aane me samay nahi lagega. Aur agar aap ek baar naav me hue chhed ko hi band kar dete hain to paani dobara kabhi nahi aayega.

Theek isi tarah agar aap apne pimples se chhutkara pane ke liye kisi cream ya gel ka istemal karte hain to pimples dobara aane lagenge. Permanent chhutkara pane ke liye yah zaruri hai ki aap pimples hone ke karan ko hi nasht karde. Isse aap pimples se hamesha hamesha se liye mukt ho jayenge. Par aisa karne ke liye yah zaruri hai ki aap pimples hone ke karan jaan len. Niche maine kuch pimples hone ke karan likhe hain. Inhe dhyaanpoorvak padhen aur samjhen.

Pimples hone ke karan

Apne skin ki safai na karna


Kayi baar aapke skin par gandagi jami rehti hai jiske karan usme maujood germs aur bacteria pimples hone ka karan bante hain.

Pet me kharabi hona


Pet me kharabi hone ke karan bahut si bimariya hoti hain. Skin ki samasyaen bhi un mese ek hain. Yadi aapka pet kharab rehta hai ya acidity hoti hai to chehre par pimples hona aam baat hai.

Khane peene ki galat aadat hona


Aajkal log teekha aur masaledar khana pasand karte hain. Khane ka yah tarika bahut si bimariyo ko amantran deta hai. Aise me pet me ulcer aur chehre par pimples ho jate hain.

Suraj ki kirano me adhik rehna


Suraj ki kirno mese ultraviolet rays nikalti hai jo ki skin aur aankho ke liye bahut hi nuksandayak hoti hain. Yadi aap suraj ki kirno me zyada samay tak rehte hain to aap pimples se prabhavit ho sakte hain.

Skin ka oily hona


Pimples hone ke kayi karano mese ek hai skin ka oily hona. Agar aapki skin oily hai tab bhi aapko pimples ho sakte hain. Aise me zaruri ye hai ki aap samay samay par apna chehra pani se dhulte rahe. Aisa karne se chehre par se oil saaf ho jayega.

Chehre par cream ka adhik istemal karna


Agar aap chehre par bahut hi zyada cream ya powder lagate hain tab bhi aapke chehre par pimples ho sakte hain. Cream ya powder chemicals se bane hote hain jo aapke chehre ki mulayam skin ko prabhavit kar sakte hain. To ye the kuch pimples hone ke karan. Ab jab aapne karan jaan liye hain to ab yah zaruri hai ki aap pimples ko hatane ke nuskhe bhi jaan len taaki aapko pimples se permanent relief mil paye.

Pimples kaise hataye?

Aloe vera ka karen istemal


Aloe vera to aajkal sabke gharo me hoti hai. Yah ek aisi aushadhi hai jo bahut se guno se bharpoor hai. Agar aapko pimples se chhutkara nahi mil raha to aloe vera ka istemal karna shuru kar den. Har roz aloe vera ke ras ko apne chehre par lagayen. Yah skin ki samasyao se mukti dega aur skin soft bhi ho jayegi.

Methi ka karen istemal


is image me methi ke plants darshaye gaye hain


Agar baat chehre ko saaf karne ki ho to methi ek bahut hi labhkari aushadhi hai. Yah daag dhabbo se chhutkara dilane me sahayak hoti hai. Methi ke patto ya methi ke beej ko pani me ubal le aur fir iska ek paste bana le. Ab pimples se prabhavit jagah par isko 15 minute tak laga rehne de aur fir thande pani se dho len. Pimples se jald chhutkara mil jayega.

Pudine ka prayog hai labhkari


Agar aap kisi buzurg se puchenge ki pimples kaise hataye, to aapko jawab me pudine ka prayog zarur sunne ko milega. Pudine me achi matra me menthol hota hai jo kheel-muhanse ki jalan ko kam karta hai. Pudine ke patto ko peeskar prabhavit shetra par lagane se pimples se rahat milti hai.

Kheere ka prayog karen


Kheere ko to hum sab salad me zarur istemal karte hain. Yah khane ka zaayka badha deta hai. Lekin kya aap jante hain ki aap kheere ko aap pimples ko door karne ke liye bhi istemal kar sakte hain? Ji haan, theek padha aapne. Pimples se chhutkara pane ke liye kheere ka paste bana le aur ise pimples par lagayen. Aap ko jald hi faayda dekhne ko milega. Iske alawa aap kheere ka prayog apni skin ko glow karne ke liye bhi kar sakte hain.

Daliye ka karen prayog


Daliya protein aur calcium ka ek acha shrot hota hai. Ise khane se humare sharir ko kaam karne ki taqat aur mazbooti milti hai. Par iske alawa aap daliye ka prayog apne kheel muhanse ko door karne ke liye bhi kar sakte hain. Iske liye pehle daliye aur shahad ka face pack bana len. Ab ise 20 minute tak pimples par laga kar rakhen. 20 minute baad ise paani se dho len. Pimples se jald chhutkara milega.

Nimbu ke ras ka karen istemal


Nimbu ek aisa fal hai jo aapko lagbhag har mausam me bazar me dekhne ko milta hai. Yah aapke chehre ke liye bahut labhdayak hota hai. Agar aap nimbu ka ras apne skin par lagate hain to aapki skin ka nikhar badh jata hai. Iske alawa agar aap nimbu ke ras ko apne pimples par lagate hain to kuch hi dino me aapke chehre se pimples poori tarah saaf ho jayenge. Aisa isliye hota hai kyunki nimbu me citric acid hota hai jo pimples ke bacteria aur germs ko nasht kar deta hai aur dheere dheere pimples bhi khatam ho jate hain.

Shahad ka bhi karen istemal


is image me ek katori me girta hua shahad dikhaya gaya hai


Jab bhi baat pimples ko hatane ki aati hai to shahad ka naam sabse pehle aata hai. Yah daag, dhabbe aur muhanso ko kam karne me sahayak hota hai. Agar aap apne chehre se pimples hatana chahte hain to raat ko sote samay apne chehre par shahad ka face pack bana kar laga len. Subah uthne ke baad apne chehre ko paani se dho len. Agar aap aisa kuch dino tak karte hain to aapke ziddi pimples jald hi aapka peecha chhodh denge.

Chehre ko paani se dhoyein


Chehre ko paani se dhona kafi labhkari mana gaya hai. Aisa karne se chehre par jami gandagi saaf hojati hai. Agar aapki skin oily hai to paani se chehre ko dhone se atirikt oil saaf ho jayega aur pimples se chhutkara mil jayega.

Multani mitti ka karen prayog


Multani mitti chehre par lagane se chehra thanda rehta hai aur kheel muhanse se hone wali jalan bhi kam ho jati hai. Iska prayog karne ke liye multani mitti ko saaf paani me bhigo de aur fir iska gadha paste banakar chehre par lagayen. 30 minute baad chehre ko dho len. Aisa pratidin karne se chehre par nikhar aata hai aur pimples se azaadi milti hai.

Pet ko rakhe saaf


Jaisa ki maine aapko upar bataya ki pimples kharab pet ki wajah se bhi hote hain. Apne pet ko saaf rakhna aapke liye bahut zaruri hai. Halka bhojan khayein aur khana khane ke baad thodi der tehelen. Isse aapka khana achi tarah se pach jayega aur pet saaf rahega. Iske alawa tel, ghee, masale ka khane me kam prayog karen. Agar aapka chehra pimples se prabhavit hai to khane me lauki ka zarur sevan karen.

Bharpoor matra me paani piyen


is image me ek ladki paani peeti hui darshayi gayi hai


Jis prakar humare sharir ko chalne firne ke liye khane ki zarurat hoti hai, theek usi tarah paani se humara sharir aur skin swasth rehta hai. Yadi aapko pimples hain ya aapko pimples hone se bachna hai to jitna ho sake utna paani piyen. Ek sath zyada paani peene ke bajaye thode thode samay par thoda paani piyen. Aapka pet saaf rahega aur pimples ya dusri skin problems se raahat milegi.


Humne aapko aapke sawaal 'Pimples kaise hataye?' ka jawab upar vistrit roop aur saral bhasha me diya. Parantu in nuskho ko apnate waqt dhairya banaye rakhen kyunki ayurvedic nuskhe dheere dheere apna asar dikhaate hain. Agar aapki samasya zyada gambheer hai ya aapko in nuskho se koi labh nahi mila ho to kisi dermatologist ki salah zarur len. Yaad rahe ki bina doctor ki salah liye kisi dawa ka sevan na karen. Ye aapke sharir ke liye hanikarak ho sakti hain.


Hum umeed karte hain ki aapko humare article 'Pimples kaise hataye - 11 saral gharelu upay' se koi madad to zarur mili hogi. Agar aapko yah article pasand aaya ho to apne family members aur friends ke sath bhi share karen taki ve log bhi 'Pimples kaise hataye?' ka jawab saral bhasha me jaan payen. 

Ye bhi padhen:

Kaise karein ghar baithe pet dard ka ilaj?
Yoga for weight loss
How to stop snoring?

Dhanyawaad.

Image source: Pixabay

Follow us on: Facebook
                       Healthocrat

No comments:

Post a Comment