Pet dard ka ilaj - Ye 20 anmol gharelu nuskhe zarur aazmayein - Healthocrat: Your ultimate fitness partner

Sunday, November 11, 2018

Pet dard ka ilaj - Ye 20 anmol gharelu nuskhe zarur aazmayein


Badalte khaanpan ke tarike aur badalti hui jivanshaili bahut se pareshaniyo ko daawat dete hain. Inhi mese ek pareshani hai pet me dard. Pet me dard aajkal maano aam baat ho chuki hai. Har aayuvarg ke log isse prabhavit hote hain. Pet dard ko door karne ke liye log tarah tarah ki dawaiyo ka sevan karte hain, parantu kayi baar ye dawaiyan aprabhavshali hoti hain aur pet dard se chhutkara nahi mil pata. Lekin kya aap jante hain ki aap pet dard ka ilaj ghar par bhi kar sakte hain?

pet dard ka ilaj


Ji han, sahi padha aapne. Aap gharelu nuskho ki madad se pet dard ka ilaj asaani se kar sakte hain. Lekin un gharelu nuskho ko janne se pehle hum pet me dard hone ke karan jaan lete hain.

Pet me dard hone ke karan

Kabz ki samasya


Kabz hone ki wajah se khana khane ke bad pet me dard hona aam baat hai. Ye samasya kada mal hone ke karan hoti hai. Yadi aapko mal tyaagne me pareshani hoti hai to yah kabz hone ka lakshan hai.

Pet me ulcer hona


Kayi baar pet me ulcer hone ki wajah se bhi pet me dard hone lagta hai. Darasal, humare pet me hydrochloric acid banta hai jo khane ko pachane me madad karta hai. Jab yah acid adhik matra me banne lagta hai to pet aur upari aant (intestine) me ulcer ki samasya paida hone lagti hai. Ulcer hone ki wajah se pet me bahut tez dard uthta hai jise bardaasht karna bahut mushkil hota hai.

Gastric samasya ya acidity hona


Gastric samasya ya acidity hone ke karan pet foolne lagta hai aur ulti, pet dard aur diarrhoea ki pareshani utpann hone lagti hain.

Pathri bhi hai pet dard ka karan


Pathri ki shikayat aajkal logo me badh gayi hai. Pet me dard pathri hone ki wajah se bhi hota hai. Agar aapko bhi lambe samay se pet dard hai to turant kisi doctor se apna checkup karwaayen.

Khane me adhik tel-masale ka prayog karna


Khane me zyada mirch, ya tel-masale ke prayog se pet me jalan hone lagti hai jiske karan pet me dard hone lagta hai. Iske alawa, khana khane ke baad turant so jana, ya kisi prakar ka nasha karna bhi pet dard ke kuch karan hain.

Kachcha khana khane se bhi hota hai pet dard


Aksar akele rehne wale logo ka khana poori tarah se pak nahi pata. Iski wajah se pet ko kachche khane ko pachane me takleef hoti hai aur pet me dard hone lagta hai. Khana jab bhi khayen humesha poori tarah se paka ke khayen.


Ab to aapne jaan hi liya hoga ki pet me dard kyu hota hai aur ab aap pet dard ka ilaj bhi jaanna chahte honge. To chaliye hum aapko batate hain ki aap ghar baithe hi pet dard ka ilaj kaise kar sakte hain.

Pet dard ka ilaj

Haran ka churan


Agar aapka pet kabz ki wajah se dard ho raha hai to kabz door karne ka ek sadharan sa upay hai haran ka churan. 3 gram haran ka churan len aur use halke garam paani me dalkar pi len. Kuch hi der me pet dard gayab hone lagega.

Sonth aur sendha namak


Sonth aur sendha namak ka churan bana kar rakh len. Is churan ko banane ke liye 3 gram sonth ke powder me 3 gram sendha namak mila kar rakh len. Isko garam paani ke sath pi len. Pet dard se jald chhutkara mil jayega.

Heeng ka kare sevan


Heeng ko garam paani me daal kar ek ghaadha sa lep bana len. Use apne nabhi ke aaspaas laga len. Aisa karne se pet dard bahut jaldi theek ho jata hai.

Namak, sonth aur heeng


Kala namak, sonth aur bhuni hui heeng, in teeno ko barabar matra me milakar churan bana kar rakh len. 3 gram churan ko garam pani ke sath pi len. Yadi aapka pet affar ki wajah se dard ho raha hai to aapko iske sevan se zarur labh milega.

Trifala aur mishri


Trifala ko peeskar churan bana len. Ab 3 gram churan le kar isme 3 gram mishri milayen aur iska sevan garam pani ke sath karen. Isse pet dard se chhutkara milega.

Nimbu aur sendha namak


is image me kate hue nimbu dikhaye gaye hain


Ek glass halke gungune paani me aadha nimbu nichode aur usme thoda sa sendha namak milakar pi len. Pet dard turant theek ho jayega.

Ajwayan aur kala namak


Ajwain aur kala namak barabar matra me peeskar churan bana len. Ab is churan ko garam pani ke sath piyen. Ise pet dard se chhutkara dilane me bahut labhkari mana jata hai.

Pudina, elaichi aur pan ke patte


Saat pudina ke patte le aur ise ek chhoti elaichi ke sath pan ke patte par rakh kar kha len. Paan ke patte pet dard se chhutkara dilane ke bahut upyogi hote hain.

Lahsun aur sendha namak


3 gram lahsun ka ras le aur isme sendha namak mila kar kha len. Isko khane ke baad ek glass garam pani pi len. Pet dard door ho jayega.

Adrak, heeng, ananaas aur sendha namak


Jab bhi aapka pet dard ho to 10 gram ananas ka ras le. Ab is ras me thoda adrak ka ras, bhuni hui heeng aur sendha namak milayen. Iska sevan karne se aapka pet dard kuch hi der me gayab ho jayega.

Tulsi aur adrak


Tulsi ka ras aur adrak ka ras barabar matra me mila len. Isko garam pani ke sath piyen. Pet dard thodi der me nasht ho jayega.

Jeera aur Shahad


Thoda sa jeera pees len. Ab isme thoda sa shahad (honey) milayen aur iska sevan halke garam pani ke sath karen. Isse aapko pet dard se rahat milegi.

Haldi aur sendha namak


Yadi aapka pet gas banne ki wajah se dard ho raha hai to haldi aur sendha namak ko barabar matra me mila len. Iska sevan garam pani ke sath karke bhi aap pet dard se nijat paa sakte hain.

Mooli, kaali mirch aur sendha namak


20 gram mooli ke ras me thoda sa sendha namak aur 4 kaali mirch milakar pees len. Ab ise garam pani ke sath khayen. Pet dard se chhutkara zarur milega.

Jamun aur sendha namak


is image me jamun rakhe dikhaye gaye hain


Jamun pet ke liye bahut labhkari hota hai. Ise pathri ya liver ke patient ke liye rambaan bataya gaya hai. Agar aapke pet me dard ho to jamun par sendha namak chhidak kar khayen. Pet dard khatam ho jayega.

Papita, kaali mirch, sendha namak aur nimbu


Papita pachan tantra ko sudharne me madad karta hai. Yadi aap papite ko kaat kar, ispar kaali mirch, sendha namak aur nimbu daalkar khate hain to kabz nasht ho jayega aur pet dard se rahat milegi.

Santra, heeng aur kaala namak


Santre ke ras me bhuni hui heeng aur kaala namak mila kar peene se bhi pet dard theek hota hai. Santre ki jagah aap anaar ke ras ka bhi prayog kar sakte hain.

Amrood ke patte


Amrood ke chaar patte le aur ise 1 cup pani me pees len. Ab is mishran ko chhan kar piyen. Pet dard se chhutkara milega. Aap iski jagah amrood ke patto ko chaba kar kha bhi sakte hain.

Maththa (butter milk), jeera aur kaala namak


Agar aapka pet dard ho raha hai to 1 glass maththa (butter milk) len aur isme thoda sa bhuna hua jeera aur kaala namak milakar piyen. Aapka pet dard turant theek ho jayega aur kabz se bhi chhutkara milega.

Isabgol ki bhoosi, sendha namak aur dahi


Isabgol ki bhoosi pet dard se chhutkara dilane me sahayak hoti hai. Isse kabz bhi nasht ho jata hai. To agar aapke pet me dard ho to thodi si isabgol ki bhoosi ko 1 katori dahi me milayen. Isme thoda sa sendha namak bhi milayen. Iske sevan se aapko turant rahat milegi.



To aaj aapne jana ki aap kaise ghar baithe pet dard ka ilaj aasani se kar sakte hain. Par yaad rahe ki agar aapke pet me dard lambe samay se hai to doctor se zarur salaah len. Pet dard me ki gayi laparwahi aapke swaasth par bahut bhaari pad sakti hai.



Hum umeed karte hain ki aapko humare article ‘Pet dard ka ilaj – Ye 20 anmol gharelu nuskhe zarur aazmayein’ se koi madad to zarur mili hogi. Agar aapko yah article pasand aaya ho to ise apne family members aur friends ke sath bhi share karen taki ve log bhi pet dard ka ilaj aasani se kar saken.



Agar aap lahsun khane ke fayde janna chahte hain to click karen aage diye gaye link par: Lahsun khane ke fayde



Dhanyawaad.


Image source: Pixabay

No comments:

Post a Comment