Mota hone ke upay - 100% Safe and Natural - Healthocrat: Your ultimate fitness partner

Sunday, November 4, 2018

Mota hone ke upay - 100% Safe and Natural

Mote log jahan apne motaape ko lekar pareshaan rehte hain, wahin patle log apne dublepan ko lekar chintit rehte hain. Ek duble patle aadmi ko zindagi me bahut si pareshaanio ka saamna karna padta hai jaise ki logo ke muh se khud ka mazak bante sunna, naukri me rukawat, shaadi me baadha, unfit sharir, aadi. Apne dublepan se tang aakar jab log mota hone ke upay talashte hain to kuch nuskhe hamesha aage nikalkar aate hain jaise zyada matra me ghee khana, tel masalon ka zyada prayog karna, protein supplements lena. Lekin, ye saare nuskhe aapko mota banane ke bajay aur bhi bimar bana dete hain.

Mota hone ke upay


Mota hone ke liye aapko aisi cheezein khani chahiye jo aasani se pach jaye tatha aapke liver ya kidney par bojh na bane. Aksar artificial supplements aapke kidney par bahut bura prabhav dalti hain jisse aapki kidney kharab ho sakti hain. To behtar yahi hai ki aap mota hone ke liye artificial ki jagah kuch natural tarike apnaayen. Isse aapke sharir par koi dushprabhaav bhi nhi padega, aur aap healthy weight bhi gain karenge.

Kya aapko vajan badhane ki zarurat hai?

Kam vajan wale vyakti ka Body mass index (BMI) 18.5 se kam hota hai. Inhe underweight ki category me rakha jata hai tatha inhe vajan badhane ki salaah di jati hai. 18.5 se zyada aur 25 se kam Body mass index wale logo ko normal mana jata hai. In logo ko na to wajan ghatane ki zarurat hoti hai, aur na hi badhane ki. 25 se zyada Body mass index wale logo ko overweight mana jata hai tatha 30 se adhik walo ko motape se grast mana jata hai. Is category me aane wale logon ko wajan ghatane ki salaah di jati hai. Agar aap bhi apna Body mass index ghar par hi nikalna chahte hain, to iske liye aapko chahiye hoga ek calculator. Niche diye gaye formula me apni height aur weight ka istemaal karke aap asaani se apna Body mass index calculate kar sakte hain.

Body mass index ka formula:

BMI = weight (in kilograms) / height (in meters) ^2

(BMI < 18.5 is underweight
BMI 18.5 - 24.9 is normal weight
BMI 25-29.9 is overweight
BMI 30-39.9 indicates obesity
BMI > 40 indicates morbid obesity)

Patla hone ke karan

Aise bahut se karan hote hain jo sharir ko patla bana dete hain. Inme se kuch karan hain:

Kuposhan

Aajkal logo ke khanpan ka tarika kafi badal gaya hai. Pehle jahan log 3 time paushtik khana khaate the, wahin ab log junk food par nirbhar rehne lage hain. Junk food se humare sharir ko paryapt matra me nutrients nahin mil pate jiski wajah se sharir patla ho jata hai. Iske alawa junk foods humare pachan tantra ko bhi kamzor kar dete hain.

Depression


Is tasveer me ek depression se pidit ladki hatho par sar rakh kar baithi hai


Sharir ke dublepan ka ek karan hai mansik tanaav. Tanaav me rehne wale logo ko bhookh kam lagti hai aur kuch khaane ka man nahi karta. Aise me unka sharir lagatar patla hota chala jata hai.

Bimari ka hona

Kayi bimariyan jaise cancer, tuberculosis, aadi ki wajah se bhi sharir patla ho jata hai. In bimario ke rehte aap chahe kitna bhi khayein, magar aapka wajan nahin badhta.

Diabetes

Madhumeh hone ka pehla lakshan yah hota hai ki sharir ke wajan me teji se giravat aati hai.

Hyperthyroidism

Humare sharir me thyroid naam ki ek granthi hoti hai jisme se thyroxine naamak hormone nikalta hai. Yadi is hormone ki matra zarurat se adhik ho jati hai to sharir ka vajan ghatne lagta hai.

Sharirik shram

Adhik sharirik shram karne se bhi sharir dubla ho jata hai. Yah isliye hota hai kyunki hum jitni calories apne shairir ko de paate hain, usse kahin zyada sharirik shram ki wajah se burn ho jati hain aur sharir patla hota chala jata hai.

Mote hone ke upay

Kela aur doodh

Har roz do kela aur ek glass doodh ka sevan karen. Isse aapke sharir ko adhik matra me calories milengi aur aapka vajan badhega. Aap ya to iska banana shake bana ke pi sakte hain, ya fir pehle kela kha ke baad me doodh pi sakte hain. Par dhyan rahe ki garam doodh ka istemal na karen. Doodh halka gunguna hona chahiye.

Ankurit moong ki dal

Kela aur doodh ke sevan ke kuch samay baad ankurit moong ka sevan karen. Moong ko ankurit karne ke liye lagbhag 12 ghante pehle ek mutthi moong naap kar paani me bhigo den. Jab moong achi tarah se fool jaye to ise kisi cotton ke kapde me lapet kar rakh den. Kuch samay baad moong ankurit ho jayegi. Ankurit moong protein ka acha shrot hota hai. Yah aapke sharir ki muscles ki growth ke liye bahut labhkari hai.

Uble (Boiled) aaloo ka sevan karen

Aaloo carbohydrates se bharpoor hota hai. Carbohydrates aapke sharir ko instant energy aur foorti pradaan karne me madad karta hai. Aaloo me adhik calories bhi hoti hain, jo aapka vajan badhaane me madad karti hain. Iske alawa aaloo ka sevan humare pachan tantra par koi dushprabhav bhi nahi daalta.

Sabudana ki kheer ka karen sevan

Agar baat mota hone ke upay ki ho, to usme sabudana ki kheer bahut labhdayak hai. Yah protein aur carbohydrates se bharpoor hoti hai tatha iske har roz ke sevan se aap healthy weight gain kar payenge. Har roz 1 bowl sabudana ki kheer jarur khayein.

Paushtik ahaar chune


Is image me ek mej par paushtik sabjiyan darshai gayi hain


Kayi log aksar yah sochte hain ki keval protein hi vajan badhata hai aur isi soch ke karan ve log protein supplements kharid kar khane lagte hain. Sath hi sath ve log baaki ke important nutrients ki taraf dhyaan nahin dete aur aksar deficiency diseases ke shikar ho jate hain. Agar aapko healthy mass gain karna hai to zaruri yah hai ki aap sare paushtik tatva samaan matra me len. Isse aapke body ka overall growth hoga aur aapke body ko energy milegi.

Thoda thoda khayein

Yadi aap apna vajan badhana chahte hain, to aapke pachan tantra ka sahi hona bahut zaruri hai. Aap apna khaana ek sath adhik matra me khaane ke bajaye thoda thoda karke kayi time khayein. Isse aapke digestive system par pressure nahi padega aur aapka liver swasth rahega. Yah mota hone ke upay me ek bahut hi prabhavshali upay hai.

Exercise zarur karen

Saara din ek jagah baith kar agar aap yah sochte hain ki isse aapka healthy mass gain hoga to aap bilkul galat hain. Isse aap mote to ho jayenge, par muscular body kabhi nahin bana payenge. Healthy weight gain karne ke liye zaruri yah hai ki aap har roz vyayaam karen aur aap jitni calories intake karte hain, uska kuch percent burn karen. Isse aapki muscles build hongi aur aapka sharir hasht pusht hoga.

Neend poori len


Is tasveer me ek sota hua insaan darshaya gaya hai


Har roz 7 se 8 ghante ki neend aapke sharir ke liye atyant avashyak hai. Isse aapka dimag relaxed rahega aur thakaan kam hogi. Exercise karne ke dauran aapki muslces par zor padta hai aur kayi baar muscles fatt bhi jati hain. 7-8 ghante sone ke baad aapki muslces dobara grow ho jati hain aur aap fir se apne kaam ko karne ke liye taiyaar ho jate hain. Iske alawa aap achi neend lene se depression jaisi samasyaon se bhi door rehte hain.

To ye the mota hone ke upay jinki madad se aap kuch hi samay me fark dekhne lagenge. Yaad rahe ki aap dawaiyon ke piche na bhaage kyunki isse aapki body par side effects pad sakte hain. Yadi aap mota hone ki dawa lena bhi chahte hain to pehle kisi doctor ki salaah zarur len kyunki aapne english me vo kahawat to suni hi hogi ki 'Health is wealth'. Sharir hi sab kuch hai tatha iski hifazat karen.
 

Hum umeed karte hain ki aapko humare article 'Mota hone ke upay' se koi madad to zarur mili hogi.


Jaane adrak se aapke sharir ko kya labh milta hai, click kare diye gaye link par: Adrak se hone wale faayde.

  Dhanyawaad

 Image source: Pixabay

No comments:

Post a Comment