Lahsun khane ke fayde - 8 mahatvapoorna labh - Healthocrat: Your ultimate fitness partner

Saturday, November 10, 2018

Lahsun khane ke fayde - 8 mahatvapoorna labh

Lahsun ka upyog to lagbhag har ghar me hota hai. Kuch log iska upyog chatni banane me karte hain aur kuch log sabzi ya daal banane me, lekin aksar log lahsun khane ke fayde se anjaan rehte hain.

Lahsun khane ke fayde

Lahsun me allicin namak tatva paya jata hai jo ise khaas banata hai. Isme antibacterial, antimicrobial, antifungal aur antioxidant properties hoti hain jo sharir ko bimariyon se door rakhti hain. Iske alawa, lahsun me vitamins aur minerals bhi achi matra me paaye jate hain. Isme vitamin B1, vitamin B6, manganese, copper, aadi jaise kayi khanij padarth hote hain.
Yadi aap har roz thodi matra me lahsun ka sevan karte hain to aapka sharir bimario se door rehega hai aur swaasth behtar rehega. Waise to lahsun har form me faydemand hota hai, lekin adhik fayda ise kachcha khane se milta hai. To ab bina zyada samay barbaad kare, chaliye kuch lahsun khane ke fayde jaante hain.

Lahsun khane ke fayde

Hraday ko swasth banaye

Lahsun dil ko swasth banane me kaargar hota hai. Yah blood circulation ko theek karta hai, cholesterol kam karta hai aur hraday sambandhit rogo se bachaav karta hai. Iske alawa yah heart attack ke chances ko bhi kam karta hai. Rozana subah 1-2 lahsun ki kali ka sevan karne se hraday ke swasthya me sudhaar aata hai.

Blood pressure ko niyantrit karta hai

Agar khoon me I-converting enzyme ya ACE naamak enzyme ka utpadan badh jata hai to isse blood pressure bhi badh jata hai. Aise me blood pressure kam karne ke liye log artificial medicines ka sevan karte hain jinse blood pressure to kam ho jata hai, parantu unke kayi side effects dekhne ko milte hain. Lahsun me gamma  glutamylcysteine naam ka ek padarth hota hai jo ACE ke production ko rokta hai aur high blood pressure ko bhi niyantrit  karne me madad karta hai. High blood pressure se pidit logo ko roz subah khali pet lahsun ki kuch kaliyan khani chahiye. Isse unki dhamniya chaudi hongi aur blood circulation bhi improve hoga.

Arthritis se chhutkara dilane me saksham

Gathiya (arthritis) ek aisi bimari hai jo bahut se logo me payi jaati hai. Yah bimari kisi bhi aayuvarg ke logo ko prabhavit kar sakti hai. Isse aapke jodo me dard hota hai aur chalne, firne ya kaam karne me bahut takleef hoti hai. Arthritis se chhutkara pane ke liye log lakh rupaye ki dawa kha lete hain, lekin yah samasya jad se nahi jaa pati. Kayi shodhkartao ne shodh se yah paya hai ki lahsun me anti-inflammatory aur antioxidant gun hote hain jo jodo ki sujan kam karne me labhkari hote hain. Yadi aap bhi gathiya rog se pareshan hain to aap lahsun ka sevan karna shuru karen. Aap iska churan bana kar bhi kha sakte hain. Lahsun ke tel se masage karne se gathiya rog se jald chhutkara milta hai.

Cancer se ladne me madadgar

Cancer ek janleva bimari hai jo har saal lakho logo ki jan leti hai. Iski dawa bahut hi mehngi hoti hai aur un dawaon ke bahut saare side effects bhi hote hain. Lahsun sharir ki pratirodhi kshamta badhane me madad karta hai aur cancer jaise gambheer rogon se ladne me hamare sharir ko sahayata pradaan karta hai. Kachche lahsun ki kaliya khane se breast, prostate, aur pancreas cancer se sharir ko bachaya ja sakta hai.

Wajan kam karne me labhkari

Lahsun satiety hormone ko niyantrit karta hai jisse pet kaafi samay tak bhara rahta hai. Isse aapki calories intake kam hojati hai aur aapka wajan ghatne lagta hai. Wajan ghatane ke liye kachche lahsun ka sevan sabse zyada labhdayak mana gaya hai. Agar aap bhi apna wajan ghatana chahate hain to har roz subah khali pet 2-3 lahsun ki kaliya khayen. Isse aapka wajan bhi ghatega aur blood circulation bhi theek rahega.

Pachan tantra ko theek rakhne me sahyogi

Lahsun sharir mese harmful waste material ko nikal deta hai aur sharir ko detox kar deta hai. Yah liver mese nikalne wale bile juice ke production ko bhi niyantrit karta hai jisse pachan shakti badhti hai. Dysentery ya apach jaisi takleefo se lahsun ki madad se asaani se nijat paya ja sakta hai. Yadi aap bhi pet ki samasyaao se pareshan hain to bazar se lahsun ki capsules le aayen aur din me teen bar iska sevan karen. Aap ise doodh ya paani ke sath bhi le sakte hain. Aisa 2-3 din tak karne se dast, dysentery aur apach jaisi pareshanio se asaani se chhutkara paya ja sakta hai. Yah lahsun khane ke fayde mese sabse zyada labhkari fayda hai.

Daant dard se raahat dilaye

Muh me 500 se adhik prakaar ke bacteria paaye jate hain. Inme se kuch bacteria sehat ke liye achche hote hain aur kuch bacteria sehat ke kiye bure hote hain. Muh ko swasth banaye rakhne ke liye yah zaruri hai ki saare bacteria santulit matra me rahen. Lahsun me allicin naamak padarth paya jata hai jo kharab bacteria ko rokta hai aur muh ko kayi bimario se bachata hai. Kayi research se yah pata chala hai ki lahsun me maujood anti-bacterial aur analgesic gun daant dard se raahat dete hain. Daant dard se turant raahat paane ke liye lahsun ko tel me paka len. Ab is tel ko prabhavit daant par lagayen. Kuch hi der me aapko daant dard se chhutkara milega. Aap tel ki jagah sukhe lahsun ke powder ka bhi upyog kar sakte hain. Yah bhi tel jitna hi prabhavshali hota hai.

Khansi se chhutkara dilaye

Lahsun me anti-viral aur anti-biotic properties hoti hain jo bronchitis, asthama, sardi, zukam jaisi samasyao se raahat dilane me labhkari hoti hai. Yah lungs me hue infection ko kam karta hai jiski madad se sans lene ki takleef se bhi nijat mil jata hai. Yadi aap inme se kisi bhi bimari se pareshan hain to aap lahsun ka sevan niyamit roop se karen. Aap lahsun ke supplements ka bhi upyog kar sakte hain. Kuch hi dino me labh avashya milega.


Chhote bachche aksar lahsun khana pasand nahin karte. Aise me aap unhe sookhe lahsun ka powder doodh ke sath khilayen. Yadi aapko niyamit roop se lahsun khane par bhi apni bimari se raahat nahin mili to turant kisi doctor se salaah len.


Hum umeed karte hain ki aapko humare article 'Lahsun khane ke fayde - 8 anokhe labh' se koi madad to zarur mili hogi. Agar aapko yah article pasand aaya to ise apne parivaar ke sadasyo aur dosto ke sath bhi share karen taki ve bhi lahsun khane ke fayde jaan saken.

Kya aap jhadte baalon se pareshan hain? Padhen baal badhane ka tarika bilkul asaan bhasha me. Click karen diye gaye link par: Baal badhane ka tarika

Dhanyawaad.

Image source: Pixabay

No comments:

Post a Comment