Khansi ka ilaj - 100% effective and natural remedies in hindi - Healthocrat: Your ultimate fitness partner

Tuesday, November 27, 2018

Khansi ka ilaj - 100% effective and natural remedies in hindi

Namaskar dosto. Kya aap khansi se pareshan hai? Agar aapka jawab haan hai to aap bilkul theek jagah par aaye hain. Is article me hum aapko khansi hone ke kuch kaaran, lakshan aur khansi ka ilaj karna batayenge jinki madad se aap jald hi apni khansi se chhutkara paa sakenge.


Khansi ka ilaj - 100% effective and natural remedies in hindi

Khansi hone ke pramukh karan

Khansi ek aam swaasth samasya hai aur yah kisi ko bhi ho sakti hai. Saal me kabhi na kabhi to har koi is samasya se pareshan rehta hi hai. Khansi ka ek sabse bada karan sankraman hota hai. Aajkal pradushan ki wajah se bahut tarah ke sankraman fail gaye hain. Bimariyo ke karan to sankraman hote hi hain, lekin chemicals aur gandagi ke karan bhi kayi sankraman hote jo sidha prabhav humare sharir par dalte hain. Iske alawa, mausam ke badalne se bhi humare sharir me khansi ki samasya paida hone lagti hai. Khanpaan me hota badlaav bhi khansi aane ka ek karan hai, jise bahut se log nahi jaante. Galat khanpaan ki aadato ki wajah se bhi is bimari se prabhavit logo me vridhhi hui hai.

Khansi saans ki nali ke upari hisse me hone wala ek sankraman hota hai jo lagbhag gale ke aaspaas ke hisse ko prabhavit karta hai. Sankraman ke karan aisa lagta hai jaise ki gale me koi cheez fansi ho aur use bahar nikalne ke liye sharir lagataar koshish karti hai.

Khansi hone ke lakshan

Khansi se prabhavit hone par bahut se lakshan dikhayi dete hain. Kayi logo ko gale me paani behta hua mehsoos hota hai, gale me dard hone lagta hai, baar baar gala saaf karna padta hai, aawaz bhi badalne lagti hai jisko aawaz ya gala baithna bhi kehte hain. Zyada khansi hone se saans foolne lagti hai, muh me khatta swaad aane lagta hai aur yadi yah samasya bahut zyada hi badh jati hai to khansi ke sath muh se khoon bhi aane lagta hai.

Jo khansi kabhi kabhi hoti hai, use chikitsa shashtra me aam baat maana jata hai yaani ki yah sharir ki ek prakritik kriya hoti hai jisse sharir vishaile tatvo ko baahar nikalne ki koshish karti hai. Isme thodi si dawa aur savdhani baratne se hi khansi poori tarah theek ho jati hai. Lekin chahe khansi normal hi kyu na ho, uska ilaj zarur karna chahiye taaki vah aage chalkar koi badi samasya na paida kar de.

Khansi ka ilaj

Yadi aapko khansi hoti hai to aapko is bimari se ghabraane ki koi zarurat nahi hai kyunki hum apne rasoi me maujood samagriyo ki madad se hi iss bimari ko door kar sakte hain. Dosto, ab mai aap bataunga ki aap khansi ka ilaj ghar baithe aasani se kaise kar sakte hain. In nuskho ko sahi dhang se apnaayein aur aapko kuch hi din me fark dekhne ho milega.

Lehsun se kare khansi ka ilaj

Lehsun sharir me maujood infection ka turant khaatma karta hai kyunki yah ek natural antibiotic, antibacterial aur natural antifungal hota hai. Iske alawa lehsun me vitamin C bhi paaya jata hai jo ki khansi ko door karne ke liye bahut acha maana gaya hai. Khansi ko jaldi theek karne ke liye hume lehsun ke ras ki avashakta hoti hai. Aap kisi bhi ayurvedic store se lehsun ka ras aasani se prapt kar sakte hain. Aap iska ras ghar par bhi nikal sakte hain. Lehsun ka ras ghar par nikaalne ke liye niche diye gaye steps ko follow kare: Lehsun khane ke fayde.
  • Ras nikaalne ke liye sabse pehle lehsun ki 5-6 kaliyo ko chhil le.
  • Lehsun ki in chhili hui kaliyo ko mixer me thode se paani ke sath pees le.
  • Fir, ise chhalni ki madad se ache se chhan le.
  • Is tarah lehsun ka ras badi aasani se nikal aayega.
Lehsun sharir ko garmahat pradaan karta hai, isliye iski bahut thodi si matra ka hi upyog karna chahiye. Lehsun ka ras milne ke baad ek katori me ras ki 5 boonde daale aur isme ek chammach shahad milayein. Yah aapki ek baar ki khurakh ban gayi. Ab ise din me do baar, subah aur raat ko sone se pehle khayein.

Ye aapki khansi ko bahut hi jaldi theek kar dega. Lehsun ke antibacterial gun turant sankraman se ladna chaalu kar dete hain aur vishaile tatvo ko sharir se baahar nikaalne lagte hain. Is tarah ek din me hi sankraman bahut kam ho jata hai. Teen se chaar din me aapki khansi poori tarah theek ho jayegi.

Lehsun khaane ke anya faayde

Lehsun ka prayog aap khansi ke sath sath gale ke dard aur balgam wali khansi se chhutkara paane ke liye kar sakte hain. Yah balgam banne se rokta hai jisse balgam wali khansi me turant fayda milta hai. Yadi aap lehsun khane ke aur bhi fayde janna chahte hain to is link par click kare:

Adrak se kare khansi ka ilaj

Dosto, khansi ka turant kaargar gharelu ilaj adrak se hota hai. Adrak behad taakatwar natural antiviral dawa hai. Yah sharir me maujood virus aur bacteria ko khatam karta hai jisse khansi jaisi bimariyo me turant fayda milta hai. Iske alawa adrak me sharir ke liye zaruri sabhi poshak tatva bhi hote hain, is karan adrak ka prayog karte hi bimari me badi teji se fayda milta hai. Bazar me milne wale cough syrup chemicals se bane hote hain jo sharir ke liye nuksandayak hote hain, jabki khansi ke liye adrak ka prayog har tarah se faydemand hota hai. To chaliye ab mai aapko batata hu ki aapko adrak ko khansi door karne ke liye kaise upyog karna hai.

Khansi door karne ke liye aapko adrak ke ras ki avashyakta hai. Iske ras ko bhi aap bazar se prapt kar sakte hain. Ghar par aap adrak ka ras do tarike se nikal sakte hain.

Adrak ka ras nikalne ka pehla tarika

  • Sabse pehle adrak ko dho kar ke achi tarah chhil le.
  • Ab is adrak ke tukde kaat kar mixer me daal kar pees le.
  • Agar zarurat pade to peeste samay thoda sa paani bhi aap isme mila sakte hain.
  • Fir, ise chhalni se chhan le. Is tarah adrak ka ras nikal jayega.

Adrak ka ras nikalne ka doosra tarika

  • Sabse pehle adrak ko chhilkar kaddukas kar le.
  • Ab is kaddukas kiye huye adrak ko chhhalni me daalkar dabayein.
  • Is tarah adrak ka ras chhalni mese nikal jayega.
  • Ek medium size ki adrak ki gaanth mese kam se kam ek chammach ras aasani se nikal jata hai.
Khansi ke ilaj ke liye ab aadhe chammach adrak ke ras ko ek katori me le. Ab isme ek chammach shahad milayein aur sath hi do chammach paani bhi isme milayein. Is tarah aapki natural cough syrup bankar taiyar hai.

Adrak se bane natural cough syrup ki poori matra, yaani aadha chammach adrak ka ras, ek chammach shahad aur do chammach paani mila kar ek baar me piyein. Ye aapki ek baar ki khurakh hai. Ise aapko din me teen baar, yaani subah, dopahar, aur raat ko peena hai. Ise peete hi pehle din se hi khansi se behad aaram mil jayega. Do se teen din me khansi poori tarah theek ho jayegi. Aap jo adrak ka ras nikaalenge, use aap fridge me rakh kar baar baar istemal kar sakte hain. Lekin jab iska upyog kare, to pehle ras ko fridge mese nikaalkar thodi der baahar rakh de taaki uska taapmaan normal ho jaaye. Parantu yaad rahe ki yadi aap adrak ka ras aap zyada matra me nikal kar fridge me rakhte hain to aap us ras ka sevan sirf 7 din tak kar sakte hain.

Adrak khane ke anya faayde

Adrak ek natural antioxidant hota hai aur yah soojan ko bhi kam karta hai. Khansi ke karan khaans khaans kar gale soojan aajati hai aur gale me dard bhi hone lagta hai. Adrak ke sevan se gale ki soojan aur dard se aaram milta hai. Kayi baar khansi se bukhar bhi aajata hai. Adrak ke upyog se bukhar bhi theek ho jata hai. Is tarah khansi ke karan hone wali saari takleefo ko adrak pal bhar me hi door kar deta hai. Agar aap adrak khane ke fayde vistaar me janna chahte hain, to is link par click kare: Adrak khane ke fayde.

Dosto, ye the kuch nuskhe jinki madad se aap bahut hi jald khansi se chhutkara paa sakte hain. Lekin aap aage chalkar hamesha swasth rahe aur kabhi khansi ka shikar na bane, uske liye yah zaruri hai ki aap kuch baato ka hamesha dhyaan rakhe. Niche di gayi baato ko dhyanpoorvak padhe.

Khansi se bachav ke liye in baato ka rakhen vishesh dhyaan

  • Thandi cheezo ka sevan thande mausam me na kare. Isse gale me sankraman hone ka khatra badh jata hai.
  • Vitamin C yukt khaadya padharth jaise amla, gobhi, paalak, patta gobhi aadi ka sevan kare. Isse khansi me aaram milta hai.
  • Gungune paani me namak daal kar raat ko sone se pehle gurgle kare. Isse gale ke dard me raahat milegi.
  • Khansi hone par koshish kare ki aap garam paani hi piyein.
  • Gale aur hatho ko dhak kar rakhein. Isse aap sardi se bache rahenge.
  • Tali bhuni cheeze ya cheezein na khayein. Isse balgam banne lagta hai aur khansi bad se badtar ho jati hai.
To dosto, aaj humne aapko bataya khansi hone ke kuch karan, lakshan, aur khansi ka ilaj jinki madad se ab aap ghar baithe khansi se bach sakte hain. Lekin agar aapko in nuskho se fayda nahi milta hai to turant kisi doctor ko dikhayein.

Hum umeed karte hain ki aapko humare article 'Khansi ka ilaj - 100% effective and natural remedies in hindi' se koi madad to zarur mili hogi. Agar aapko yah article pasand aaya ho to is article ko apne family members aur friends se sath bhi zarur share kare taki ve log bhi khansi ka ilaj asaani se ghar baithe kar sake. 

Dhanyawaad.

Image credits: Background image created by Freepik

No comments:

Post a Comment